Tor Møgedal til minne

Minneord om Tor Møgedal, 1940–2025 Tor Møgedal og kona Sigrun reiste ut for Tibetmisjonen (no HimalPartner) i 1970 saman med sonen Oddmund. I desember same året fekk dei dottera Ingun. Tor hadde sin arbeidsplass i Nepal fram til desember 1982 då familien returnerte til Norge. Tor heldt fram som fulltids tilsett i misjonen si teneste med oppfølging av prosjekt i Nepal heilt fram til 1997. I denne perioden hadde han base i Norge og kortvarige opphald i Nepal. Tor var ein dyktig maskiningeniør, og meir enn vanleg praktisk anlagt. Særleg hadde han interesse for alt som hadde med motorar og mekanikk å gjera. Dette var til god nytte for misjonen sitt mangfaldige utviklingsarbeid i fjellandet Nepal. Han hadde mellom anna ansvar for montering av kraftverksutstyr og industri-maskiner, vøle av køyretøy og mekaniske utstyr av ulikt slag. Ein kunne finna Tor dampande sveitt i 35 graders varme, med oljeflekka kjeledress, og nødvendig verktøy i handa. Han var aldri redd for hardt arbeid eller for å jobba skulder ved skulder saman med sine nepalske kollegaer.   I misjonstenesta hadde Tor ulike rollar. Han hadde mellom anna leiaransvar i misjonen sitt industrisenter i Butwal (Butwal Technical Institute), underviste og gav opplæring til unge studentar i maskinfaget. I Norge var han primus motor for demontering av kraftverks-utstyr, innkjøp av brukte anleggsmaskiner, pakking av desse og sending til Nepal via Calcutta. Ein stor jobb med mange utfordringar. Alt arbeid såg han som del av misjonskallet sitt.   Tor var ein som våga å stå i motvind og seia ifrå når situasjonen kravde det. Hardt arbeid kombinert med hans ærlege veremåte, vart høgt verdsett blant vener og medarbeidarar. Tor var ein person til å stola på. I tillegg til å vera ein god medarbeidar, var han og ein trufast medvandrar og støttespelar for mange i livets motbakkar. Han hadde ein eigen evne til å sjå og visa omsorg for dei som hadde det vanskeleg, anten dei var nepalarar eller misjonærkollegaer. Mange, både i Nepal og Norge, har gode minne frå samver med Tor. Vi i HimalPartner-fellesskapet kjem til å sakna han og er takksame for alt han delte av erfaring og livsvisdom. Etter nokre år med sviktande helse, døydde Tor fredeleg i heimen 22. januar 2025. Tankane går til Sigrun, Oddmund og Ingunn med familiar som har mist ein kjær ektefelle, far, svigerfar og bestefar. Vi lyser fred over Tor sitt minne. Tore og Ragnhild Skeie på vegne av HimalPartner

Publiseringsdato 28.01.2025